كل ما تريد معرفته عن كلية طب الأسنان.. سلسلة الجامعة

#سلسلة_الجامعة
#كلية_طب_الأسنان
خلينا متفقين أن عدد مش قليل من الطلبة اللي بتدخل أسنان بيكونوا جايبين مجموع عالي بس هم فضلوا الطريق ده، يعني مش لازم عشان جايب مجموع طب تدخل طب لا ممكن تدخل أسنان لو بتحبها....
.
طيب المهم نظام الدراسة في أسنان ازاي؟!
-أسنان ٥ سنين وسنة امتياز في كل الجامعات بس تقسيمهم بيختلف...بمعنى أن في جامعات بتعتبر أول سنة اعدادي زي اسكندرية وطنطا والمنصورة وبيدرسوا فيها مواد من علوم زي كيميا وفيزيا وحيوان، وفي جامعات مفيهاش اعدادي ومن أول سنة بيبدأوا يدرسوا مواد أسنان عادي من غير مواد علوم...وفي كل الحالات سواء جانعاك هتبدأ اعدادي او سنة أولى بيضيفوا مادة او اتنين من طب وبيكونوا بشكل مبسط مش بتوسع طب وفي مادة رئيسية لازم تدرسها وهي خاصة بأسنان اسمها "Dental Anatomy" ودي بتدرس فيها بالتفصيل تركيب كل سِنة....
-في السنين اللي بعد كده بتكون دراستك متخصصة أكتر ممكن تدرس مواد من بشري بس المعظم من أسنان زي في تانية وتالتة، وفي رابعة وخامسة بتدرس الجراحة والتقويم والجذور واللثة...

نتكلم عن العملي؟
- العملي معاك في السكاشن من أول سنة، سواء عملي اعدادي اللي بيكون كله تجارب فيزيا وكيميا
أو عملي أسنان في أول سنة شغل (أو لعب بمعنى أصح) بالشمع وتسييح وتعمل مودلز للسنان كلها بمقاساتها وحاجة لعب ومتعة للصبح يعني
- تاني وتالت سنة برضو عملي بس بأدوات تانية بتعمل تركيبات وشكل الفك كله وكلها بأيدك.
- من رابع سنة بتبدأ تشتغل مع الpatients عملي في الكلية وتنزل عيادات، تعملهم حشو وتركيبات وغيره..
-بعد ما بتخلص بيكون عندك امتياز وتكليف ودول بتشتغل فيهم في الكلية أول وحدة صحية وبالتزامن مع ده ممكن تبدا شغل خاص بيك في عيادة مثلاً...

طب شغلك ازاي بعد ما تخرج؟؟!
-بعد ما بتتخرج ممكن تتخصص في مجال من مجالات طب الأسنان عن طريق تحضير ماجستير وغيره ومن المجالات دي: جراحة الوجة والفكين، طب أسنان الأطفال وتقويم الأسنان والفكين وفي مجالات تانية طبعا...
- تقدر تاخد كورسات في التجميل تشتغل في dental care center وده بيكون مختص بتجميل الفم والاسنان من حيث التبييض والتركيب وغيره.. مش خلع وحشو بس ما معروف عننا..
- تقدر تفتح عيادة بس للأطفال عشان تبعد عنهم فكرة فوبيا دكتور الاسنان، ودي مشهورة جداً بره مصر وبدأت تنتشر في مصر، وانت بتشتغل فيه شاشة لعرض كرتون مثلاً يتلهووا فيها  تقدر تشجعهم بهدايا ومعجون سنان بflavors، أدواتك بتبأة مخصصة للأطفال بأشكال متخوفهمش..
- ليك تكليف تشتغل بيه في وحدة صحية لمدة ٦ شهور في القرى، بعدها ممكن تتنقل لمستشفى أو مركز طبي أو وحدة صحية تانية.
- ممكن تتخصص في مجال معين حبيته لو رتبت وجبت تقدير كويس، زي جراحة أو تقويم غيره، وتفتح عيادة برضو بس هتكون دكتور متخصص مش عام وده هيساعدك.

أقدر أقولك إن طِب الأسنان من الكليات الممتعة فعلاً، سواء في الكلية فأنت مش هتتعب في النظري، العملي بمتعته هينسّيك.. والشغل مع تعبه ف هو ده المجال اللي انت اخترته وحبيته.. ولما تشوف نجاحك فيه هيهون عليك.