لطلاب الثانوية العامة | كل ما تريد معرفته عن كلية فنون جميلة

لطلاب الثانوية العامة | كل ما تريد معرفته 
كلية فنون_جميلة
نفكركم بتقسيمات كليات الفنون :
الفنون التطبيقية: بتقبل من علمي رياضة - علوم (واتكلمنا عنها بالتفصيل ف البوست ال فات)
الفنون الجميلة: ودي متقسمة لـ جزئين: (ركزوا فيهم كويس عشان هنتكلم عنهم كتير 🥱)
- قسم عمارة: بيقبل من علمي رياضة بس
- أقسام الفنون:
- قسم ديكور: بيقبل من علمي علوم - رياضة
- باقي الأقسام(نحت، جرافيك، تصوير): بتقبل من علمي وأدبي
التربية الفنية: بتقبل من جميع الشعب
فنون جميلة من الكليات ال لازم تنجح ف امتحان القدرات بتاعها (وال بيكون مختلف ع حسب القسم ال بتقدم عليه) عشان تتقبل فيها + المجموع بتاعك بناء ع التنسيق.
السؤال المتكرر عن فنون جميلة، هو لازم أكون باعرف ارسم كويس عشان أدخل فنون جميلة؟
زي ما شوفنا التقسيمة فوق إن فنون جميلة ف القدرات بتتقسم لقدرات عمارة وفنون، ف لو إنت مقدم لقدرات الفنون، ف آه لازم تكون عندك مهارات كويسة ف الرسم مش لازم تبقي بيرفكت بس ع الأقل عندك اساسيات كتير، لأن مقاييس القبول ف فنون جميلة من الناحية الفنية أكتر من فنون تطبيقية بشويتين
ودا منطقي جدا لأن فنون جميلة اعتمادها الأكبر ع الناحية الجمالية (ال بقوانين مش الذوق الشخصي أينعم)، لكن تطبيقية فيها ناحية هندسية شوية، ف بيكون الجانب الجمالي فيها مش أهم مقياس.
لو مقدم لقسم عمارة، ف لأ مش مهم أوي لأن الامتحان بيكون مركز ع مهارات الهندسية والمنظور أكتر منها الناحية الجمالية.
الدراسة:
الكلية 5 سنين..
سنة إعدادي، و4 سنين تخصص..
السنة الإعدادي بتفرق ف دراستها ع حسب إنت مقدم على إيه
- لو مقدم عمارة: فأنت بتتخصص من أول سنة، وسنة إعدادي بيكون فيها مواد مخصصة للقسم نفسه.
زي مثلا أسس تصميم، وهندسة وصفية، وتصميم معماري.
- لو مقدم ديكور: بتتخصص بردو من اول سنة، وسنة إعدادي بتاخد فيها مواد مخصصة للقسم نفسه.
زي مثلا أسس تصميم، وإسقاط هندسي، ورسم، وتصميمات.
- لو مقدم فنون: فأنت بتتخصص من تاني سنة، وف أول سنة بتاخد مواد خاصة بال3 أقسام الفنية، فبتتأهل ليهم هم ال3 عشان كدا بيكون ليك حق الاختيار بينهم من تاني سنة
زي اسس تصميم، الرسم، الحفر، التصوير، النحت، التشريح.
زي ما قرأتوا إن في مادة اساسية لكل الأقسام وهي أسس تصميم، ودا عشان زي ما قولنا، إنها بتهتم بالناحية الجمالية المبنية ع قوانين وقواعد مش بشكل عشوائي.
في مواد عامة ف اعدادي مشتركة بين كل الأقسام زي انجليزي وتاريخ حضارة وحقوق إنسان.
في مواد مشتركة بين عمارة وديكور زي الفيزيا والكيميا.
التخصص:
توضيح إن ف تعريفك سنوات الكلية، لما بتقول أنا أولى تخصص بتكون ف تانية جامعة لأن عندك سنة اعدادي
فنون جميلة موجودة في 5 جامعات حكومية (حلوان واسكندرية والمنيا وأسيوط والأقصر)، ومش موحودة ف جامعات خاصة.
بيكون في تنسيق داخلي لل3 تخصصات الفنية بعد سنة اعدادي، بيكون نفس النظام بتاع ثانوي إنك بعد النتيجة بتدخل الرغبات بتاعتك وبعدين بتظهر النتيجة وبعدين بيظهر تنسيق الأقسام وبتعرف إنت اتخصصت إيه.
الأقسام الأساسية = 5 أقسام موجودين ف كل الجامعات، في جامعات عندها تغيرات بسيطة جدا جدا هنتكلم عليها عند كل قسم.
الأقسام:
قسم عمارة: دراستهم فيها من أول سنة بتكون متخصصة ف العمارة، وكل مواد سنين الكلية بتهتم إنها تخرج مصمم معماري قادر يبقي فاهم كويس العمارة اساسها إيه وتنفيذها بشكل صح أزاي.
والخريج منها بيكون متعلم كتير عن: التصميم المعمارى، تخطيط المدن، تصميم المواقع والاسكان، تصميمات تنفيذية، المعالجة البيئية للمبانى(يعني بتعرف إيه تأثير البيئة المحيطة بالمبني على المواد ال انت مستخدمها)، الانشاء المعمارى، التجهيزات الفنية للمبانى(ودا من ضمن مميزات عمارة فنون جميلة)، المنظور الهندسى والظل، طرز معمارية، ونظريات التخطيط.
طيب إيه الفرق بين عمارة فنون جميلة، وعمارة هندسة؟
دا سؤال من الأسئلة التاريخية لقسم العمارة وال مفيش حد بيقدر يجاوب عليه إجابة جوهرية ف اساس الشغل نفسه لأنك محتاج حد يكون درس ف الكليتين ودا قد يكون مستحيل ومعظم الفروقات بتكون تقنية ف شكل الدراسة مش أكتر.
ف خلينا ف المهم إن القسم دا بيكون فرصة كويسة لل مش لحق هندسة بسبب المجموع.
قسم الديكور:من اسمه بيهتم بالناحية الجمالية للمكان، وشكل ديكوراته عاملة ازاي وإيه أنسب حاجة نقدر نستخدمها ف المكان ع حسب وظيفته وذوق صاحبه، سواء كانت بيوت أو محلات ومعارض، أو مسارح، أو أفلام وغيرهم.
سنين الكلية فيها مواد بتركز إنهم يكونوا عندهم معلومات كتير عن: تصميمات العمارة الداخلية، تصميمات الديكور التنفيذية، طرز التأثيت (من الأثاث)، تصميمات الفنون التعبيرية، نظريات الديكور، الاسقاط الهندسى، دراسات تحليلية، هندسة المناظر، مواصفات التخصص الفنية وحساب الكميات، تنفيذ وماكيت، تاريخ مسرح وسينما، وكاميرا واضاءة.
ف سنة 3 تخصص بتبدأ تختار شعبة تتخصص فيها أكتر ما بين شعبتين:
 أ - العمارة الداخلية
ب - الفنون التعبيرية (ديكورات المسارح والسينما والدراما)
قسم الجرافيك (وال اسمه قسم التصميمات المطبوعة في جامعة اسكندرية): وبيهتم برسم الجرافيك = باختصار وببساطة إنك بتحول الرسومات الورقية بتاعتك لرسومات ديجيتال، وال بتدرس فيه مواد متخصصة جدا ف الرسم والشخصيات وغيره
ف سنة 3 تخصص بتبدأ تختار شعبة تتخصص فيها أكتر:
جامعة حلوان:
1. شعبة الرسوم المتحركة ورسوم الكتاب (الشعبة دي موجودة ف جامعة المنيا كقسم مستقل عن قسم الجرافيك) وال بتهتم إنك تبقي خارج من الكلية قادر تشتغل شغل أنيميشن، وال بيكون عبارة عن إنك بترسم ال objects بتاعتك وبتبدأ تحركها زي ما أنت حاطط الفكرة.
2. شعبة التصميم المطبوع: وال بيكون ف البوسترات وغيره، والقصد منه إنه بيكون لقطة واحدة مش متحركة زي الانيميشن.
(باختصار زي الصورة والفيديو)
جامعة اسكندرية متشعبة أكتر بنفس المعنى لشعب جامعة حلوان لكن المسميات مختلفة:
1. شعبة الاتصال الجرافيكي
2. شعبة رسوم النشر والصور الإيضاحية
3. شعبة الطبعة الفنية
قسم النحت: بتبقي قادر تنحت أشكال وأجسام للنصب التذكارية او الأماكن الاثرية والمؤسسات الوطنية سواء المحلية أو الأجنبية.
ف سنة 3 تخصص بتبدأ تختار شعبة تتخصص فيها أكتر:
1. النحت الميداني والفراغي (أن بيكون عندك مساحة فاضية زي ميدان أو مدخل قصر وهكذا وبتبدأ تقرر هتملاها بأنهي عناصر نحتية)
2. شعبة النحت البارز والميداليات (بيكون إن عندك سطح معين وتبدأ تنحت فيه الخامة الزيادة عشان ف الآخر يطلع الشكل ال أنت عايزه)
ف جامعة اسكندرية متشعبة أكتر من كدا وبيكون في شعبة خاصة للميداليات، وشعبة خاصة للنحت الخزفي (يعني النحت باستخدام مادة الخزف)
في جامعة المنيا عندها قسم زيادة إسمه الترميم وصيانة الآثار، هو ليه علاقة بالنحت لكن بسبب طبيعة المنيا والبلاد ال حواليها ف بيحتاجوا ناس متخصصين ف ترميم الآثار عشان آثار الأقصر وأسوان.
قسم التصوير (تصوير بمعنى الرسم مش التصوير الفوتوغرافي): ودا ال بيكون عندهم الجانب الفني كبيير جدا، وال بيعملوا اللوحات ال بتتباع وهكذا.
ف سنة 3 تخصص بتبدأ تختار شعبة تتخصص فيها أكتر ما بين شعبتين:
1. شعبة التصوير وال بتتعلم فيها طبيعة حية والرسم الكروكي بالقواعد الصح، والمناظر الخلوية، وكمان بتتعلم فيها ترميم اللوحات الفنية.
2. شعبة التصوير الجداري: ال بتتعلم فيها الرسم ع الجداريات والحيطان وهكذا.
طبيعي جدا إنك تحس إن مش فاهم الفاظ كتير من ال اتقالت، ببساطة خد اللفظ وحطه ف الgoogle search هيطلع لك صور كتير هتفهم منها القصد من الكلام
طبيعة الدراسة:
1. جزء عملي: ودا جزء كبير جدا ومهم جدا ف الكلية ف اي تخصص، ودا ال بنعمل فيه مشاريع ولوحات وبنسهر ف الكلية ونطبق ف البيت بالأيام عشان ننجزه وممكن بعد دا كله يترفض وتروح تعيده زي العسل كدا
2. جزء نظري: هو مهم جدا عشان المعلومات النظرية بتساعد ف التطبيق، لكن مش بيحتاج مجهود ومعظم الدكاترة بيكونوا مقدرين إننا مسحولين ف العملي فبيسهلوا علينا النظري